خاکی کووچەی یارەکەم و من دەڵێم

من دەڵێم شاری دڵم باغ و گوڵستانە دەچم
عەقڵ ئەڵێ ناقەسەبە شۆڕشی مەستانە نەچی

من دەڵێم نوختەیی ئەو ڕەوزەنی ئیمانە دەچم
ئەو دەڵێ نا، ڕەشە جێ ڕاوگەیی شەیتانە نەچی

من دەڵێم جێگەیی هەر شێت و جنوونانە دەچم
ئەو دەڵێ نا زەدەیی پەنجەیی پەریانە نەچی

من دەڵێم مەسکەن و ئارامگەیی جانانە دەچم
ئەو دەڵێ سەربەسەری تێک چووە وێرانە، نەچی

من دەڵێم مەرکەزی ئەسراری حەریفانە دەچم
ئەو دەڵێ جێ تەمەعی چاوی حەسوودانە نەچی

من دەڵێم وەختی خەتەر مەئمەن و قەڵغانە دەچم
ئەو دەڵێ کون کونە جێگەی سەری پەیکانە نەچی

خاکی کووچەی یارەکەم ئکسیری ساغی و ژینمە
جوانی ڕوخسار و نگاری هێزی ئەژنۆ و تینمە
بۆچی بەم دەردەم ئەبەی خۆ خۆت ئەزانی حاڵەکەم
بۆ قژی ژاکاو و لوولت دایمە هەر شینمە

هەر وەکوو پووش و پەڵاش کەوتووم لە کووچەی یاردا
گێژەلووکەش نامفڕێنێ چوونکە کەعبەی دینمە
گەر بە بێ تۆ بچمە باغ و سەیری سەرو و شۆڕەبی
تف لە سەرو و شۆڕەبی، بێ تۆ لە هەردوو قینمە

خەڵک ئەڵێن کفرە مەکە بەم تەرحە مەدحی یاری خۆت
گوێگرانی خۆشەویست من یارەکەم ئایینمە
لەم هەموو چوون و نەچوونە سەری سووڕما کامیل
من دەڵێم جوانە بچم ئەو دەڵێ وا جوانە نەچی

Min delêm şarî dilim bax û gulistane deçim
eql elê naqesebe şorişî mestane neçî

Min delêm nuxteyî ew rewzenî îmane deçim
Ew delî na, reşe cê rawgeyî şeytane neçî

Min delêm cêgeyî her şêt û cinûnane deçim
Ew delê na zedeyî penceyî peryane neçî

Min delêm mesken û aramgeyî canane deçim
Ew delê serbeserî têk çuwe wêrane, neçî

Min delêm merkezî esrarî herîfane deçim
Ew delê cê temeyî çawî hesûdane neçî

Min delêm wextî xeter memen û qelxane deçim
Ew delê kun kune cêgey serî peykane neçî

Xakî kuçey yarekem iksîrî saxî û jînime
Ciwanî ruxsar û nigarî hêzî ejno û tînime
Boçî bem derdem ebey xo xot ezanî halekem
Bo qijî jakaw û lûlit dayime her şînime

Her wekû pûş û pelaş kewtûm le kûçey yarda
Gêjelûkeş namfirênê çûnke ke’bey dînime
Ger be bê to biçme bax û seyrî seru û şorebî
Tif le seru û şorebî bê to le herdû qînime

Xelk elên kifre meke bem terhe medhî yarî xot
Gwêgiranî xoşewîst min yarekem ayînime
Lem hemû çûn û neçûne serî sûrma Kamîl
Min delêm ciwane biçim ew delê wa ciwane neçî