خەمی چۆلەکەکان

کەمخایەن بوو عومری گەنجی هەر ناشزانم چۆن تێپەڕی
لەم وەرزی پایزەی عومرم گەڵای خەون و خۆزگەم وەری

کێ گوێ لە خەمی من ئەگرێ باسی خەمم دوایی نایەت
مەگەر تەنیا چۆلەکەکان بۆ ئەم وەرزەم ببنە شایەت
لە ڕۆژی دەیجووری ژینم تروسکایی بەدی ناکەم
تازە تەمەن بەجێی هێشتم ئیتر بە هیچ خەونێک ناگەم

خۆزگە منیش وەک سنەوبەرێک هەمیشە جوان و سەوز ئەبووم
یان بە وێنەی گوڵی مینا گوڵی گەشی چواروەرز ئەبووم
ئەوە تاڵ تاڵ پرچی سپیم بۆ تەنیاییم ئەهۆنمەوە
تەنیا هەر خۆم ڕۆژژمێری خەمەکانم ئەخوێنمەوە

Kemxayen bû ’umrî gencî her naşzanim çon têperî
Lem werzî payzey ’umirim gelay xewn û xozgem werî

Kê gwê le xemî min egrê basî xemim dwayî nayet
Meger tenya çolekekan bo em werzem bibne şayet
Le rojî deycûrî jînim tiruskayî bedî nakem
Taze temen becêy hêştim îtir be hîç xewnêk nagem

Xozge minîş wek sinewberêk hemîşe cwan û sewz ebûm
Yan be wêney gulî mîna gulî geşî çwarwerz ebûm
Ewe tal tal pirçî sipîm bo tenyayîm ehonmewe
Tenya her xom rojjimêrî xemekanim exwênmewe