سینەی پڕ ئاهم

سینەی پڕ ئاهم هەورێ تیا ئەگری
لە چاوانمەوە باران داناکا
عومریش بەفری بە هەتاوێکە
هەر ئەبێ بە شوێن مردنا ڕاکا

کێ بێ پاییزی دڵەی ئاوارەم
بنێتە کۆشی فرمێسکی بەهار
کەشتییەکی وێڵ لە دەریای تووشا
تۆ بڵێی ڕۆژێک بگات بە کەنار
تۆ بڵێی ڕۆژێک بگاتە کەنار

بۆ شادمانی زۆر کورتە تەمەن
بۆ کوێرەوەریی نابڕێتەوە
چۆن گڕ ناگرێ بەفری بەر هەتاو
خۆ دوای چەند ساتێک هەر ئەتوێتەوە
ئای چەندە مەیلم لە گریانێکە
دڵ و جەرگمی تیا بتوێتەوە
تەنیام و تەنیا کەس نییە باوەشی
بۆ ئەم ئازارەی من بگرێتەوە

Sîney pir ahim hewrê tya egrî
Le çawanmewe baran danaka
’umrîş befrî be hetawêke
Her ebê be şwên mirdina raka

Kê bê payîzî diley awarem
Binête koşî firmêskî behar
Keştîyekî wêl le deryay tûşa
To bilêy rojêk bigat be kenar
To bilêy rojêk bigate kenar

Bo şadmanî zor kurte temen
Bo kwêrewerîy nabrêtewe
Çon gir nagrê befrî ber hetaw
Xo dway çend satêk her etwêtewe
Ay çende meylim le giryanêke
Dil û cergimî tya bitwêtewe
Tenyam û tenya kes nîye baweşî
Bo em azarey min bigrêtewe