وا بەهار هات بە خۆشی

وا بەهار هات بە خۆشی چیا و هەرد بەرگی پۆشی
گوڵاڵەسوورە و نێرگز دەشت و دەری داپۆشی

کاتی سەیران و گەشتە، لاو و پیر ڕووی لە دەشتە
هەموو کەسێ دڵ ئازاد دنیا ئەڵێی بەهەشتە

سەوزەگیا و گوڵەزەردە فەرشی ڕاخەری هەردە
ئاوەدان بێ خاکی وا پیرۆز بە گەلی کوردە

زەردەی دەمەوئێوارە گەردانەی ملی یارە
بزە و قاقای پێکەنین مۆسیقای بەرەو شارە

کانی و ئاو بە قوڵەقوڵ ڕووناکی ئەخاتە دڵ
شنەی شەماڵ بۆنی گوڵ ئەهێنێ لە لق و چڵ
وا بەهار هات بە خۆشی چیا و هەرد بەرگی پۆشی
گوڵاڵەسوورە و نێرگز دەشت و دەری داپۆشی

Wa behar hat be xoşî çya û herd bergî poşî
Gulalesûre û nêrgiz deşt û derî dapoşî

Katî seyran û geşte, law û pîr rûy le deşte
Hemû kesê dil azad dinya elêy beheşte

Sewzegya û gulezerde ferşî raxerî herde
Awedan bê xakî wa pîroz be gelî kurde

Zerdey demew’êware gerdaney milî yare
Bize û qaqay pêkenîn mosîqay berew şare

Kanî û aw be qulequl rûnakî exate dil
Şiney şemal bonî gul ehênê le liq û çil
Wa behar hat be xoşî çya û herd bergî poşî
Gulalesûre û nêrgiz deşt û derî dapoşî