من هەم

دۆسم وەرە بە ناڕەوا لە بوونی من خۆ مەبوێرە
سەرنج بدە و بە شنەیی بۆ داستانم گوێ ڕادێرە
ڕەنگە لە نێو نەخشەکاندا ناوی منتان نەهێنا بێ
یان بە پیتی ناحەزانم حاشا لە بوونم کرا بێ
بەڵام دۆستم دڵنیا بە بووم و هەم و ناتوێمەوە
لە نێو دڵی خەڵکی خۆمدا بە هیچ هێزێک نابڕێمەوە

ڕۆڵەکانم هەر سروودی بوونی منە و دەیخوێننەوە
ڕێبوارانی ڕێی ڕزگاریم ناوی منە و دەیڵێنەوە
من ئاوێتەی پێڵی دیجلە هەواڵ هەنگاوی فوراتم
ئەمن گەوەی سەختی ئاگریم ڕزگ و ڕەگەی ئاراراتم
من لە ناخی زاگرۆسدام و قەندیل و ئاگری و هەڵگوردم
خۆگێلکردن سوودی نییە، بزر نابێ زێدی کوردم

بەیانییان کاتێ گزینگ لوتکەی کێوم ڕادەمووسێ
ڕەنگدانەوەی بوونی منە و تاپۆی هەرمانم دەنووسێ
چۆن ون دەبم من لە ئەشکی مناڵانی باوککوژراودا
لە نێو ڕەنگ و ڕوومەتزەردیی دایکانی جگەرسووتاودا
من ئاوێتەی عەشقی پاکی کیژ و کوڕی کوردەواریم
لە نێوە زەردەی بزرکاوی کۆرپەی دوورا بەختیاریم

ڕۆژاوایی زۆر لەمەوپێش نکوولیتان لە بوونم کرد
پەیمانی شوومی لۆزانتان بە دیاری بۆ دوژمنان برد
بەڵام دیارە ئەگەر ڕاس بێ ڕۆژ و مانگ و ئاسمان هەیە
یان لە جێیەکدا ئەگەر ڕاس بێ ڕاستی هەیە و ژیان هەیە
ئەوە ڕاستە منیش هەم و قەت ون نابێ کەسایەتیم
لەگەڵ خەڵکی گەورەی خۆمدا تا هەتایە هەم و دەژیم

Dosim were be narewa le bûnî min xo mebwêre
Serinc bide û be şineyî bo dastanim gwê radêre
Renge le nêw nexşekanda nawî mintan nehêna bê
Yan be pîtî nahezanim haşa le bûnim kira bê
Belam dostim dilnya be bûm û hem û natwêmewe
Le nêw dilî xelkî xomda be hîç hêzêk nabrêmewe

Rolekanim her sirûdî bûnî mine û deyxiwênnewe
Rêbwaranî rêy rizgarîm nawî mine û deylênewe
Min awêtey pêlî dîcle hewal hengawî furatim
Emin gewey sextî agirîm rizg û regey araratim
Min le naxî zagrosdam û qendîl û agirî û helgurdim
Xogêlkirdin sûdî nîye, bizir nabê zêdî kurdim

Beyanîyan katê gizîng lutkey kêwim rademûsê
Rengidanewey bûnî mine û tapoy hermanim denûsê
Çon win debim min le eşkî minalanî bawkikujrawda
Le nêw reng û rûmetzerdîy daykanî cigersûtawda
Min awêtey ’eşqî pakî kîj û kurî kurdewarîm
Le nêwe zerdey bizirkawî korpey dûra bextyarîm

Rojawayî zor lemewpêş nikûlîtan le bûnim kird
Peymanî şûmî lozantan be dyarî bo dujminan bird
Belam dyare eger ras bê roj û mang û asman heye
Yan le cêyekda eger ras bê rastî heye û jyan heye
Ewe raste minîş hem û qet win nabê kesayetîm
Legel xelkî gewrey xomda ta hetaye hem û dejîm