ڕازی دڵ

ئاشقم من، ئاشقێکی تاسەبار و دڵپڕم
شاخی ئازارە دەروونی پڕ لە فرمێسک و گڕم
من مەلێکی مات و دڵمردووی خەزان بووم، ئەشقی تۆ
هێز و تینی دا بە باڵم تا بەرەو ژین هەڵفڕم
شۆخی تەڕپۆشی بەهارئاسای لە پاییزی منا
گوڵبزەی لێوت گەشەی خستۆتە ناخی پڕ گڕم
بەژنی سەوزی تۆ بەهاری ئەشق و هەست و جوانییە
بۆیە دەخوازم ئەویندارانە چاوت تێبڕم
تاوی کوڵمە و تاڵە تیشکی ڕووت کە دەپژێنی لە ڕووم
ساردە وەرزم لادەچێ، دەژیێتەوە جەستەی سڕم
تیشکی ئەشقی دا لە چاوم خۆری کەزیەت دەرکەوت
ڕۆشنیی هاویشتە شەوگاری دڵی مات و کڕم
ئەشقی سەوزت ڕۆحی تاساندم، زمانم چوو لە گۆ
بۆیە ناتوانم بە دڵ ڕازی دڵت بۆ دەربڕم

Aşqim min, aşqêkî tasebar û dilpirim
Şaxî azare derûnî pir le firmêsk û girim
Min melêkî mat û dilmirdûy xezan bûm, eşqî to
Hêz û tînî da be balim ta berew jîn helfirim
Şoxî terpoşî behar’asay le payîzî mina
Gulbizey lêwit geşey xistote naxî pir girim
Bejnî sewzî to beharî eşq û hest û cwanîye
Boye dexwazim ewîndarane çawit têbirim
Tawî kulme û tale tîşkî rût ke depjênî le rûm
Sarde werzim ladeçê, dejyêtewe cestey sirim
Tîşkî eşqî da le çawim xorî kezyet derkewt
Roşnîy hawîşte şewgarî dilî mat û kirim
Eşqî sewzit rohî tasandim, zimanim çû le go
Boye natwanim be dil razî dilit bo derbirim