کیژە کورد

ئەرێ ئەی کیژە کوردی چاو کەژاڵە
ئەرێ ئەی کیژە کوردەی چاو کەژاڵە
ئەرێ ئەی شۆخ و شەنگەی چاردە ساڵە
ئەتۆ خۆت کورد و خوێنی لاوی کوردان
بە تورکی چاوی مەستت کرد حەواڵە
بە خوێنی مەی دەدەی ئاوی مژۆڵت
بژانگت بۆ چی سەر نێزەی کەماڵە؟
ڕنووی سەر ئاگرین لاجانگ و کوڵمت
لە خوێنی نەوجەوانان دا شەڵاڵە
بڵێی ئێران و عارەب بێ، دڵی تۆ
کە لێی تەئسیرێ ناکا ئاە و ناڵە
مەگەر چاڵی چەنەت زیندانی قەسرە؟
کە ڕزگاربوونی ئێمەی لێ مەحاڵە
تەنافی زولفت ئاوێزانی باڵات
نەمانی هاونەژادانت خەیاڵە

ڕۆحت بردم بە قەندی لێوەکانت
دەزانی کورد بە قەند وێرانهماڵە!
قەباڵەی عاشقیم زۆر موعتەبەر بوو
چ قەوما چاوم ئەمڕۆ پێت بەتاڵە
لە ئاە و ئەشکی بێچاران بترسە
وەئەستۆ مەگرە چیدی ئەو وەباڵە
مەگەر ترست نییە دەستی زەمانە
وەڕێت بێنێتەوە ئەم ژینە تاڵە؟
کوڕی شێران و زۆرزان بووم لە دەس تۆ
هەژارێکم زمانم لەنگ و لاڵە

Erê ey kîje kurdî çaw kejale
Erê ey kîje kurdey çaw kejale
Erê ey şox û şengey çarde sale
Eto xot kurd û xwênî lawî kurdan
Be turkî çawî mestit kird hewale
Be xwênî mey dedey awî mijolit
Bijangit bo çî ser nêzey kemale?
Rinûy ser agirîn lacang û kulimit
Le xwênî newcewanan da şelale
Bilêy êran û ’areb bê, dilî to
Ke lêy te’sîrê naka ئاە û nale
Meger çalî çenet zîndanî qesre?
Ke rizgarbûnî êmey lê mehale
Tenafî zulifit awêzanî balat
Nemanî hawnejadanit xeyale

Rohit birdim be qendî lêwekanit
Dezanî kurd be qend wêranhimale!
Qebaley ’aşiqîm zor mu’teber bû
Çi qewma çawim emro pêt betale
Le ئاە û eşkî bêçaran bitirse
We’esto megre çîdî ew webale
Meger tirist nîye destî zemane
Werêt bênêtewe em jîne tale?
Kurî şêran û zorzan bûm le des to
Hejarêkim zimanim leng û lale