ئەی باڵداری ئێسک سووک

ئەی باڵداری ئێسک سووک
بولبولی دەنووک بچووک
باخچە بە باخچە ئەفڕی
وچانێکی لێ ئەگری
کام سەرچڵ دڵت گرتی
دەنگی لێ هەڵئەبڕی
کام ئاوازە شیرینە
ڕووناکی و نەشئەی ژینە

بە چوار دەوریا ئەپژێنی
دنیا پێ ئەکەنێنی
لەو گەرووە بچکۆلانە
ئەم نەغمە بەرز و جوانە
چۆن دێتە دەر؟ چۆن ئەڕژێ؟
وا گیان ئەسمێ، هۆش ئەمژێ؟

منیش دەروونم شاد بێ
ملم لە بەند ئازاد بێ
دەور و پشتم گوڵزار بێ
عومرم یەکسەر بەهار بێ
پەرداخی ئاوم  گوڵ بێ
جێی حەسانەوەم چڵ بێ

عەشقم وەک عەشقت پاک بێ
پڕ لە هیوا و ڕووناک بێ
ئەبەدی بێ و پڕجۆش بێ
ئەوەندەی هی تۆ خۆش بێ
منیش ئەی مەلی پیرۆز
بە یەک چریکەی پڕسۆز

بەستەی وات بۆ ئەخوێنم
کە جوان جوان بیلەرزێنم
ڕووی کام گۆم شین و مەنگە
کام درەخت شۆخ و شەنگە
کام شاخ کە سەخت و بەرزە
بیخەمە بوومەلەرزە
کام ئاسمان بێ بنە
ناخی پڕ کەم لە شنە

Ey baldarî êsk sûk
Bulbulî denûk biçûk
Baxçe be baxçe efrî
Wiçanêkî lê egrî
Kam serçil dilit girtî
Dengî lê hel’ebrî
Kam awaze şîrîne
Rûnakî û neş’ey jîne

Be çwar dewrya epjênî
Dinya pê ekenênî
Lew geruwe biçkolane
Em nexme berz û cwane
Çon dête der? çon erjê?
Wa gyan esmê, hoş emjê?

Minîş derûnim şad bê
Milim le bend azad bê
Dewr û piştim gulzar bê
’umirim yekser behar bê
Perdaxî awim gul bê
Cêy hesanewem çil bê

’eşqim wek ’eşqit pak bê
Pir le hîwa û rûnak bê
Ebedî bê û pircoş bê
Ewendey hî to xoş bê
Minîş ey melî pîroz
Be yek çirîkey pirsoz

Bestey wat bo exwênim
Ke cwan cwan bîlerzênim
Rûy kam gom şîn û menge
Kam dirext şox û şenge
Kam şax ke sext û berze
Bîxeme bûmelerze
Kam asman bê bine
Naxî pir kem le şine